Әһли Бејт -АБНА- хәбәр аҝентлијинин вердији хәбәрә әсасән бәднам “еуровисион” јарышмасындан сонра ҝөзләнилдији кими һакимијјәт өлкәдә вәзијјәти бир гәдәр дә ҝәрҝинләшдирмәк истигамәтиндә аддымлар атмаға башлады. Сон заманлар реаллашдырылан һәбсләр, ҝәнҹ фәалларын тез-тез полис бөлмәләринә дәвәт едилмәси буну бир даһа сүбут едир. Һакимијјәтин атдығы бу аддымларын маһијјәти барәдә бу вә башга суаллары танынмыш һүгугшүнас Гурбан Мәммәдова үнванладыг:

- Бу, һакимијјәт үчүн ади бир һалдыр. Режим өзүнү горумаг истәјир. Бу истигамәтдә дә һакимијјәт бүтүн гануни вә ганунсуз тәдбирләри һәјата кечирир. Биз кимләрлә үзбәүз олдуғумузу там анлајана гәдәр бу һәрәкәтләр бизә тәәҹҹүблү ҝөрсәнәҹәк. Бизи азәрбајҹанлы олараг тәбии ки, бу суаллар марагландырыр. Биз халг олараг билмәлијик ки, һазырда һакимијјәти ганунсуз јолла әлә кечирән вә ону ганунсуз үсулларла әлиндә сахламаға чалышан ҹинајәткар групла үзбәүзүк. Бу ҹинајәткар груп ачыг шәкилдә дөвләт әмлакыны јол чәкмәк, тикинти ады илә таламагла мәшғулдур. Коррупсија вә рүшвәт өлкәни бүрүјүб. Бүтүн дөвләт органларында рүшвәтхорлуг вә коррупсија ади нормаја чеврилиб. Милјардлар уғрунда мүбаризәдә режимдән истәнилән аддымы ҝөзләмәлијик. Ајры-арјы ҝәнҹләрин тәгиби, һүгуг мүдафиәчиләринин һәбси индики режимин бахышындан тәбии вә нормалдыр.

- Авропа Бирлијинин Азәрбајҹанла бағлы бир мүддәт әввәл сәрт гәтнамәси олду. Һәмин гәтнамәдә инсан һаглары позунтусунда, инсанлара ишҝәнҹә вермәкдә иттһам олунан мәмурлара гаршы сәрт санксијаларын тәтбиг олунаҹағы билдирилир. Сизҹә, бу сијаһыја һансы мәмурларын адлары дахил едилмәлидир?

- Ишҝәнҹә, кимләринсә һүгунун позулмасы бахымындан конкрет мәмурлары иттиһам едә билмәрәм. Бунун үчүн конкрет мәһкәмә гәрары олмалыдыр. Амма режимин рәсми башчылары кими Илһам Әлијев, Рамиз Меһдијев, Рамил Усубовун, Елдар Маһмудовун хариҹә чыхышы гадаған едилмәлидир. Чүнки режимин башында дуран бунлардыр. Үмумијјәтлә, бүтүн назирләрин, бүтүн прокурорларын, һакимләрин хариҹә чыхмасына гадаға гојулмалыдыр. Чүнки режимин түғјан етдији мәһз бу идарәләрдир. Өлкәдә коррупсија, рүшвәтхорлуг баш алыб ҝедирсә, дөвләтә башчылыг едән шәхс, назир мәсулијјәт дашыјыр. Ја бу шәхсләр коррупсијанын тәшкилатчысыдыр, ҹинајәткардыр, һәбс олунмалыдыр. Ја да нәзарәти итириб вә буна ҝөрә дә ҹаваб вермәлидир. Она ҝөрә дүшүнүрәм ки, Авропа Бирлијинин санксија сијаһысына бүтүн вәзифәдә оланлар салынмалыдыр.

Азәрбајҹан режими илә Гәззафинин давраныш гајдасы ејнидир

- Һакимијјәт ганунвериҹилик саһәсиндә бир сыра мүртәҹе аддымлар атараг өлкәдәки дуруму даһа да ағырлашдырыб. Милли Мәҹлисин “Информасија әлдә етмәк һаггында” гануна етдији дәјишиклик буну сүбут едир. Сизҹә, бу ганун нәјә һесабланыб?

- Бу режимин өзүнү мүдафиә һәрәкәтләри бизи тәәҹҹүбләндирмәмәлидир. Вахтилә Гәззафи бүтүн дүнјаја гаршы чыхараг, онлары лаға гојурду. Ејни һәрәкәтләри дә һазыркы режим едир. Ҝөрүнүр, бүтүн дүнјада диктатура режимләринин давраныш гајдасы ејнидир. Бу режимләрин тарихдә ҝәлиши вә ҝедиши дә ејни амилләрә бағлыдыр. Азәрбајҹан парламентиндә Алманија вә Авропа илә бағлы едилән чыхыша диггәт јетирсәниз, бизим һансы сијаси әхлаг саһибләри илә үз-үзә дурдуғумузу даһа јахшы анларыг. Азәрбајҹан халгы талејинә саһиб чыхмалыдыр. Бу мәлумат алманын да чәтинләшдирилмәси, ганунларын сәртләшдирилмәси һакимијјәтин өзүнү горума инстиктиндән ирәли ҝәлир. Үмумијјәтлә, һакимијјәт бүтүн ганунлары гәбул едәндә өзләринин ҝәләҹәјини горумаг үчүн едир. Мәсәлән, Ҹинајәт Мәҹәлләсиндә ганунсуз һөкм чыхармағын, сечки позунтуларына јол верәнләрин ҹәзасы јүнҝүлдүр. Бу ҹәзалар амнистијаја дүшүр. Амма сијаси фәалларын, һүгуг мүдафиәчиләринин һәбс олундуғу маддәләр амнистијадан кәнардадыр.

- Сон заманлар дөвләт башчысы Илһам Әлијевлә јанашы Нахчыван Али Мәҹлисинин сәдри Васиф Талыбовун да ады бејнәлхалг тәшкилатларын сијаһысына дүшүр. Үмумијјәтлә, Нахчыван режимин бир полигону сајылыр ки, орада сынагдан чыхарылан методлар сонра даһа ҝениш формада Азәрбајҹанда тәтбиг олунур. Амма бу негатив мәгамлар арадан галдырылмаг әвәзинә Нахчывана дөвләтчилик атрибутлары верилир...

- О да истисна дејил ки, һаким аилә Нахчываны өзүнүн мүлкү кими һазырлајыр, бирдән онлары Азәрбајҹандан говсалар ҝедиб ора сығынсынлар. Бу, хам хәјалдыр. Нахчывана әлавә дөвләтчилик атрибутларынын верилмәси Гарабаға ҝәләҹәкдә верилә биләҹәк статуса һазырлыг мәгсәди дашыјыр. Диҝәр тәрәфдән, дүшүнүрәм ки, Васиф Талыбовун Нахчыванда етдикләри чох шиширдилир. Чүнки Васиф Талыбов Азәрбајҹанын биринҹи адамы дејил. О, Нахчыванда етдикләрини өзбашына реаллашдырмајыб. Васиф Талыбов мүәјјәнләшдирилән курса ујғун һәрәкәт едиб. Белә ҝөтүрәндә Азәрбајҹандакы иҹра башчылары арасында ән јахшысы елә Васиф Талыбовдур. Мүгајисәдә онун Нахчывандакы абадлыг ишләри Азәрбајҹанда ән јахшы сајыла биләр. Азәрбајҹанда нә баш верирсә, Рамиз Меһдијевлә Илһам Әлијевин рәһбәрлији алтында реаллашыр.

Елнур Сејидовун һәбсинин узадылмасы Әли Кәримлијә тәзјигдир

- Һакимијјәтин сијаси оппонентләринә гаршы чиркин кампанијасы давам етмәкдәдир. АХҸП сәдри Әли Кәримлинин гајны Елнур Сејидов мәһкәмәдә билдириб ки, үч ај әрзиндә онун барәсиндә һеч бир истинтаг һәрәкәти ҝөрүлмәјиб. Вә о, һәбс мүддәтинин даһа 3 ај артырылмасыны конкрет олараг Ә.Кәримлијә гаршы сијаси тәзјиг кими дәјәрләндириб...

- Әлбәттә, бу, Әли Кәримлијә гаршы бир сијаси тәзјигдир. Бунун башга ады јохдур. Һәр бир халг билмәлидир ки, һансы режимлә үзбәүздүр. Һазыркы гурлуш диктатура, анархија режимидир. Бу өлкәдә мәһкәмә системи јохдур. Мәһкәмәләр ҝөстәришлә, тапшырыгла һәрәкәт едирләр. Азәрбајҹанда бәзән бошанма ишләринә објектив бахылыр, галан һеч бир ишә објектив бахылмыр. Азәрбајҹанда инсаны һәбс едирләр вә даһа сонра она гаршы иттиһам ахтармаға, сүбут топламаға башлајырлар. Бүтүн диктатура режимләринин рәһбәрләри ејни методларла идарәчилијә үстүнлүк верирләр.

- Һакимијјәтин тәблиғатында әсас тезисләрдән бири Авропанын һазырда бөјүк бөһран ичәрисиндә олмасыдыр. Игтидар идеологлары елан едирләр ки, һазырда Авропа игтисади сабитлијинә ҝөрә Азәрбајҹандан гат-гат ҝери галыр вә авропалылар диләнчи ҝүнүндә јашајырлар...

- Мән он ҝүндүр ки, Авропадајам. Әҝәр авропалылар һәгигәтән дә диләнчи вәзијјәтиндәдирләрсә, о заман мән дә Азәрбајҹан халгына бу ҹүр диләнчи вәзијјәтдә өлмәји арзулајырам. Бу һакимијјәт башыны итириб. Бу игтидар тәблиғаты да дүзҝүн баҹармыр. Иддиа едирләр ки, Алманијанын “Опел” автомобил ширкәтинин бир заводу бағланыр. Бу о демәкдир ки, “Опел”ин даһа чох заводу вар вә о, бу заводларын һамысына хәрҹ чәкмәк истәмир, она ҝөрә бағлајыр. Алманијада бу ширкәтдән башга нечә марка машын заводу вар. Бәс Азәрбајҹанын нәји вар? Азәрбајҹан вәтәндашы инсан кими јашамагдан мәһрумдур. Авропада күчәләрдә полис ҝөзә дәјмир. Инсанлар шад, хүррәм вә тәһлүкәсиз јашајырлар.

Сечки комиссијалары сахтакарларын әлиндән алынмалыдыр

- Дахили ишләр назири Рамил Усубов өлкәдәки һазыркы криминоҝен дурумдан сөһбәт ачаркән билдириб ки, Азәрбајҹандакы һазыркы стабиллик Авропа өлкәләриндән ирәлидәдир вә онун горунмасы да јүксәк сәвијјәдә тәшкил олунуб. Бу иддианы нә дәрәҹәдә әсаслы сајмаг олар?

- Бу, стабиллик сөзүнүн алтында кимин нә ҝизләтдијиндән вә онун мәнасыны кимин неҹә баша дүшмәсиндән асылыдыр. Тәбии ки, һаким аиләнин марагларынын, өзбашналыгларынын горунмасы, халгын сусдурулмасы, мүхалифәтин сәсинин боғулмасы, сөз вә мәтбуат азадлығынын мәһдудлашдырылмасы бахымындан Азәрбајҹанда там мүтләг бир сабитлик вар. Бу призмадан баханда Рамил Усубов һаглыдыр. Амма халгын рифаһынын чичәкләнмәси, дөвләт бүдҹәсинин дағыдылмасынын гаршысынын алынмасы, һәјат сәвијјәсинин јахшылашдырылмасы бахымындан Авропа Азәрбајҹанла мүгајисә олунмаз дәрәҹәдәдир. Онларын марағындадыр ки, өзләрини горусунлар, милләт аҹындан өлсүн вә етираз едә билмәсин. Мәһз бу јанашмадан һакимијјәт стабиллији тәмин едиб. Амма Авропадакы стабиллик тамамилә башга анлајышдыр.

- Әрәб өлкәләриндә баш верән дәјишикликләр заманы мүшаһидә етдијимиз бир мәгам да ондан ибарәт иди ки, режимләрә тәзјигләр артдыгҹа дахилдәки стабиллик позулурду. Бу бахымдан ҝәлән ил Азәрбајҹанда сечки илидир вә артыг демократик Гәрбдән Азәрбајҹана гаршы сәрт месажлар үнванланмагдадыр. Сизҹә, бу месажлар сәртләшдикҹә һакимијјәт дахилиндә һансы просесләр јашана биләр?

- Бејнәлхалг аләмин мүнасибәтинин даһа да сәртләшмәси, принсипиал вә ардыҹыл характерли олмасы үчүн бизим өзүмүз дүзҝүн мүбаризә методу сечмәлијик. Мән дәфәләрлә демишәм. Индики шәртләр дахилиндә бу режимлә сечкијә ҝетмәк Азәрбајҹан халгынын мәнафејинә, дөвләтчилијимизә зиддир. Иҹтимаи Палатанын топлантысында өз мөвгејими бир даһа тәкрарлајаҹағам. Сечки мүһити, Сечки Мәҹәлләси дәјишмәјинҹә, бу сахтакарларын әлиндән сечки комиссијалары алынмајынҹа, паритет әсасларла вә ја бејнәлхалг тәшкилатларын иштиракы илә Азәрбајҹанда сечки тәшкил олунмајынҹа, бу ҹинајәткарларла сечкијә ҝетмәк олмаз. Һакимијјәт дахилиндәки мүнасибәтләрә ҝәлинҹә, бејнәлхалг тәзјиг артдыгҹа бу позулмајаҹаг. Чүнки Һејдәр Әлијевин әсасыны гојдуғу бу систем өз дахилиндә мүстәгил аддымлары гәбул етмир. Режим әтрафына мүстәгил шәхсләри јығмадығы үчүн дә, онларын һәр һансы мүстәгил аддым атмасы да реал дејил.

Диггәт: Хәбәрдән истифадә етдикдә мәнбәјә истинад лазымдыр