Әһли Бејт -АБНА- хәбәр аҝентлији- Мүбарәк Рамазан ајынын 15 Ислам Пејғәнбәри Муһәммәд Ибн Әбдуллаһын (сәлләллаһу әлејһи вә алиһ) нәслиндән олан мәсум өвлады, Ислам Аләминин икинҹи Имамы, Һәсән ибни Әли әл-Мүҹтәбанын (әлејһис сәлам) анадан олан ҝүнүдүр.

Бу ҝүн дүнја мүсәлманларынын ән севинҹли ҝүнләриндән бири сајылыр. Бу ҝүндә Алаһ Тәалаја едилән дуаларын гәбул олан ҝүнүдүр. Биз АБНА олараг дүнја мүсәлманларынын бу севинҹинә гошулур вә  мисилсиз бајрам мүнасибәти илә башда Имам Заман (Аллаһ Тәала онун шәрәфли ҝәлишини тезләшдирсин) Һәзрәтләри вә онун һагг наиби Имам Хаменеји ҹәнаблары олмагла бүтүн бәшәријјәти сәмими гәлбдән тәбрик едирик.

Имам Һәсәнин (әлејһис сәлам) һәјаты барәдә гыса мәлумат.

Имам Һәсән Мүҹтәба һиҹрәтин 3-ҹү или Рамазан ајынын 15-дә Мәдинә шәһәриндә дүнјаја ҝәлмишдир.

Һәсән бабасы Мәһәммәд пејғәмбәрин дөврүнү чох ҝөрмәмишди. Чүнки тәхминән једди јашында оларкән бабасы шәһадәтә чатмышдыр. Пејғәмбәрдән (с) сонра тәхминән отуз ил атасы Әли илә бирҝә олмушдур. Атасынын шәһадәтиндән сонра (һиҹрәтин гырхынҹы илиндән) он ил мүддәтинә гәдәр мүсәлманлара Имамлыг (башчылыг) етмиш вә нәһајәт һиҹрәтин әллинҹи илиндә Мүавијәнин һијләси илә гырх сәккиз јашында Мүавијјәнин (Аллаһын Ләнәти она олсун) тәһрики илә ханымы тәрәфиндән зәһәрләнмиш вә шәһадәтә говушмушдур. Мүгәддәс мәзары Мәдинә шәһәриндәки Бәги гәбиристанлығындадыр. Гардашы Имам Һүсејн (әлејһис сәлам) Имам Һәсәни (әлејһи сәлам) Мәсҹидун Нәбијјидә Пејғәнбәрин мүбарәк мәзарынын јанында торпаға басдырмаг истәдикдә мөмүнләрин анасы Аишә ханым үсјан едәрәк бу ишә мане олмуш вә һәтта Аишәнин адамлары тәрәфиндән Имам Һәсәнин (әлејһис сәлам) мүбарәк ҹәназәсинә онларла ох атараг ҹәназәни охламышлар.

Мәзлумларын көмәкчиси

Ислам дининдә варлы вә имканлы шәхсләр касыб вә имкансыз шәхсләрә гаршы бөјүк мәсулијјәт дашыјырлар. Дәрин мәнәви әһдләр вә мүсәлманлар арасында бәргәрар олмуш дини гардашлыглара әсасән, варлылар касыбларын еһтијаҹларыны мүмкүн гәдәр тәмин етмәјә чалышмалыдырлар. Ислам пејғәмбәри вә дини рәһбәрләр бу барәдә нә тәкҹә сифаришләр етмиш, һәтта һәрә өз заманында инсансевәрлијин вә зәифпәрвәрлијин бир нүмунәси олмушлар.

Имам Һәсән елм, тәгва, заһидлик вә ибадәтлә јанашы ејни заманда өз дөврүнүн сәхавәтли шәхси,мәзлумларын көмәкчиси мискинләрә көмәк едән бир шәхс кими дә танынмышдыр. О Һәзрәтин вүҹуду дәрдли үрәкләрин, фағыр вә имкансызларын пәнаһы, еһтијаҹы оланларын үмид јери иди. Белә ки, бир касыб белә онун евиндән әлибош ҝери гајытмамышдыр. Гәлби сынмыш һәр һансы бир шәхс дәрдини она ачыб сөјләсәјди, Имам Һәсән онун дәрдинә мүтләг бир мәлһәм гојарды. Һәтта бәзи вахтлар имкансыз шәхс өзү еһтијаҹыны демәздән вә хәҹаләт тәри төкмәздән габаг Имам онун еһтијаҹыны өдәјәр вә она хәҹаләт тәри төкмәјә, утанмаға иҹазә вермәзди.

Сүјути өз китабында јазыр: "Һәсән ибн Әли бир чох әхлаги дәјәрләр вә инсани фәзиләтләрә малик иди. О, алиҹәнаб, сәбирли, вүгарлы, мәтин,сәхавәтли вә ҹамаатын һөрмәт бәсләдији (рәғбәтини газанмыш) бир шәхсијјәт иди."

Ибрәтамиз инҹәлик

Имам Һәсән бәзи вахтлар еһтијаҹы олан шәхсләрә күлли мигдарда пул бағышлајарды. Белә ки, бу мигдар пулу бир јердә бағышламаг ҹамааты һејран гојарды. Имам Һәсән бу ҹүр күлли мигдарда пулу бир дәфәјә бағышламасынын бир инҹәлији о иди ки, Имам Һәсән еһтијаҹы олан шәхси бир дәфәлик еһтијаҹсыз едәрди. Имкансыз шәхс бу пулла бүтүн еһтијаҹларыны өдәјәр вә бундан сонра да еһтијаҹсыз јашаја биләрди. Һәмчинин, бу пулла әлинә сәрмајә дә ҝәтирә биләрди. Имам Һәсән касыба онун бир ҝүнлүк еһтијаҹларыны өдәјән мигдарда пул вермәји рәва ҝөрмүрдү. Белә олан һалда, һәмин шәхс мәҹбур олуб ҝүндәлик јемәји үчүн она-буна әл узатмалы иди. Бу сәбәбә ҝөрә дә Һәзрәт Һәсән касыба чохлу пул верәрди.

Елм вә фәзиләт аиләси

Бир ҝүн Осман мәсҹидин кәнарында отурмушду. Касыб бир киши ондан көмәк истәди. Осман чыхарыб она бир дирһәм пул верди. Киши Османа деди: "Мәни елә бир адамын јанына ҝөндәр ки, мәнә бир аз чох көмәк етсин." Осман мәсҹидин бир күнҹүндә әјләшмиш Имам Һәсән вә Абдуллаһ ибн Ҹәфәрә тәрәф ишарә едиб кишијә деди ки, орада отурмуш ҹаванларын јанына ҝет вә онлардан көмәк истә. Киши онларын јанына ҝәлиб көмәк истәди. Имам Һәсән бујурду: "Анҹаг үч һалда башгаларындан мадди көмәк истәмәк олар: Бојнунда дијә (ган баһасы) олуб ону өдәјә билмәдикдә; күлли мигдарда борҹлу олуб гајтармаг игтидарында олмадыгда вә еһтијаҹ ичиндә олуб әли һеч бир јерә чатмадыгда. Инди бу үч шејин һансы бири сәнә үз вермишдир?" Киши ҹаваб верди ки, мәнә дә мәһз бу үч шејдән бири үз вериб. Имам Һәсән чыхарыб әлли динар (бир динар он дирһәмә бәрабәрдир) пул кишијә верди. Буну ҝөрән Имам Һүсејн да гырх доггуз динар, даһа сонра Абдуллаһ ибн Ҹәфәр гырх сәккиз динар кишијә вердиләр.

Касыб киши гајыдаркән Османын јанындан кечирди. Осман кишијә деди: "Нә олду?" Киши ҹаваб верди ки,сәндән пул истәдим вердин, анҹаг һеч сорушмадын пулу нәјә ҝөрә истәјирәм. Анҹаг о үч нәфәрин јанына ҝедәндә, онлардан бири олан Һәсән истәјимин сәбәбини сорушду. Мән дә ҹаваб вердим. Сонра онларын һәрәси мәнә бу гәдәр пул верди. Осман деди: "Бу аилә елм, һикмәт чешмәси,фәзиләт вә јахшылыг мәнбәјидир. Онлар кимисини нә вахт тапа биләрсән? "

Мисилсиз бәхшиш

Имам Һәсән бүтүн гүдрәтини јахшы вә Аллаһ бәјәнән јолларда сәрф едәр, Аллаһ јолунда чохлу мигдарда пул бәхшиш едәрди. Тарихчиләр вә алимләр о Һәзрәтин шәрәфли һәјаты һаггында мисилсиз бир бәхшиш гејд етмишләр ки, бу да һеч бир рәһбәрин һәјатында ҝөзә дәјмир. Имамын бу һәрәкәти о Һәзрәтин әлиачыглығындан әлавә онун дүнјанын алдадыҹы наз-немәтинә олан етинасызлығыны да ҝөстәрир. Тарихчиләр јазырлар: "Имам Һәсән Мүҹтәба өмрүндә ики дәфә бүтүн мал-дөвләтини, үч дәфә исә мал-дөвләтинин тән јарысыны Аллаһ јолунда хәрҹләмишдир."

Васитәли көмәклик

Һәсәнин шәхсијјәтинин бөјүк вә али олмасы бир нәфәр имкансыз шәхсин онун евиндән әлибош ҝери гајытмасына иҹазә вермирди. Имамын бирбаша вә билаваситә көмәк етмәјә имканы олмадыгда,васитәли шәкилдә имкансызларын еһтијаҹыны өдәмәјә чалышарды. О, мүхтәлиф јолларла тәдбир ҝөрүб еһтијаҹлары өдәјәр вә мүшкүлаты һәлл едәрди.

Бир ҝүн касыб бир киши Һәсәнын јанына ҝәлиб ондан көмәк истәди. Иш елә ҝәтирмишди ки, һәмин вахт Имамын пулу јох иди. Диҝәр тәрәфдән дә касыб кишинин онун евиндән әлибош ҝери гајытмасы Имам Һәсән утандырырды. Буна ҝөрә Имам Һәсән кишијә бујурду:

— Сәни мәгсәдинә чатмаг үчүн бир јерә ҝөндәрсәм разы оларсан?

— Һара?

— Бу ҝүн хәлифәнин гызы рәһмәтә ҝетмишдир, хәлифә гызына әза сахлајыр, һәлә һеч кәс она ҝәлиб башсағлығы вермәмишдир. Хәлифәнин јанына ҝет вә сәнә өјрәдәҹәјим ифадә илә она башсағлығы вер. Сән бу јолла өз мәгсәдинә наил оларсан.

— Хәлифәјә неҹә башсағлығы верим?

— Хәлифәнин јанына ҝедиб белә де: "Әлһәмду лиллаһилләзи сәтәрәһа биҹулусикә әла гәбриһа вә ла һәтәкәһа биҹулусиһа әла гәбрик." Јәни гызын сәндән габаг дүнјасыны дәјишиб торпаг алтында јатмышдырса, бу, атасынын сајәсиндәдир. Јох әҝәр сән ондан тез өлсәјдин, ола биләрди ки, онун һәјасы ҝетсин.

Касыб киши Имам Һәсәнын дедији кими дә етди.

Мәһәббәтлә долу олан хәлифәнин гәлбиндә бөјүк тәсир ҝөстәрди вә онун кәдәрини, гәм-гүссәсини азалтды. Хәлифә әмр етди ки, кишијә бәхшиш версинләр. Сонра хәлифә кишидән сорушду: "Бу сөзләри сән өзүндән дедин, јохса сәни бир өјрәдән вар?" Киши ҹаваб верди ки, хејр, бунлары мәнә Һәсән ибн Әли өјрәтмишдир. Хәлифә деди: "Доғру дејирсән, о, фәсаһәтли вә ширин сөзләр мәнбәјидир."

Диггәт: Хәбәрдән истифадә етдикдә мәнбәјә истинад лазымдыр