Әһли Бејт -АБНА- хәбәр аҝентлијинин вердији хәбәрә әсасән сон ајлар әрзиндә Азәрбајҹан Ислам Партијасы үзвләринин истефа вермәси барәдә мәтбуатда мүхтәлиф мәлуматлар јер алыр. Лакин истефа верән шәхсләр барәдә АИП рәсми ачыглама вериб ки, истефа вермәси иддиа олунан үзвләрин партијаја һеч бир аидијјәти јохдур. “Баш верәнләр Ислам Партијасына гаршы һәјата кечирилән мәкрли планын тәркиб һиссәсидир. Сон заманлар партијаја үзв оланларын мүгабилиндә бир нәфәрин истефа вермәси олдугҹа әһәмијјәтсиз бир мәсәләдир. Бу мәлуматлары јајанларын хүсуси мараглары вар вә ислам дүшмәнләринин һәдәфләринә хидмәт едирләр ” , - АИП-ин јајдығы рәсми мәлуматда билдирилир.

Гејд едәк ки, партија үзвләринин истефа вермәси илә бағлы јајылан мәлуматлардан јалныз бири доғру чыхды. О да АИП-ин Бинәгәди Рајон Комитәсинин сәдр мүавини Мурад Оруҹовун истефасы иди. Партијадан Мурад Оруҹовун истефа вермәси илә бағлы јајылан мәлумат тәсдигләниб.

Лакин бу ҝүн нөвбәти дәфә АИП-ин Сумгајыт Комитәсинин Сәдри, партијада чох нүфузлу шәхс олан Вүгар Ибадовун истефа вермәси илә бағлы мәлумат јајылыб. Мәлуматда гејд едилир ки, партија рәһбәрлији бу истефаны мәтбуатдан ҝизләтмәјә чалышыр вә Кәрбәлаји Вүгара чох јүксәк мадди тәминат тәклиф олунуб.

Баш верәнләрлә бағлы АИП-ин Сумгајыт Шәһәр Комитәсинин сәдри Вүгар Ибадовла әлагә сахладыг. Комитә сәдри гејд етди ки, онун истефа вермәси илә бағлы дејилән мәлуматларын һамысы јаландыр: “Мәним истефам вердијим дејәнләр гәләт едирләр. Партијада фәалијјәт ҝөстәрмәјимиз бизим үчүн илаһи вә әгидәви бир мәсәләдир. Биз иманымызы вә мәнәвијјатымызы бәзиләри кими һеч вахт мадди шејләрә гурбан вермәрик. Иддиа едирләр ки, мәнә күлли мигдарда пул тәклиф олунуб. Мән өзүм дәмирчијәм. Өз әлимин зәһмәти илә рузи газанырам. Биз Аллаһа хатир вә ислами дәјәрләрин мүдафиәси үчүн фәалијјәт ҝөстәририк. Әҝәр партијадан мәнә һәр һансы бир пул тәклифи олунсајды, чохдан истефа верәрдим. Она ҝөрә ки, бизим ишләримиз јалныз Аллаһ үчүндүр.”

Диггәт: Хәбәрдән истифадә етдикдә мәнбәјә истинад лазымдыр